Question over KIO leadership (Letter)

Tsawra Hkungga ai hte,

N dai laika hpe Amyusha ni yawng aq ninggawn akyu ara hte Wunpawng myusha ningbaw ni, Myen hpyen du salang ni the, jahkrup nga ai lam hta, jut shara mi e akyu rawng na re ngu, ka dat n’ngai.

2009 August shat 3 ya shani Du Kaba Gauri Zau Seng the hkrum jahta lu ai gaw grain an, akyu nga sai. Rai yang KIO/KIA hku nna, Myen Du ni aq Mungdan Tara Kanu (Constitution) hpe mung hkap la sai, Ralata Poi (Election) galaw na lamang hpe mung hkap la da sai. Du kaba Gauri Zau Seng a ningmu gaw “Change” byin na matu n-dai hku sa ra lam, sang lang dan sai. N-dai ladat hku n-rai yang Myen wa gaw Hpyen ladat hku aten galu naw up nga mai ai hte anhte hku nna Hpyen wa hpe Hpyen ladat hku naw matut up shangun na i? shing nrai galai shai kau shangun na i? Hkri Maran Htu San san ai hta— Myen du ni gaw buhpun palawng sha galai kau n’na masha gaw mi na ni nan nan sha re, dai majaw kaja wa Change byin na kun? Du Kaba tsun ai hta— du na shaning htawm hpang e galai shai hkra galaw la ga, masha ka da ai hpe masha gram lu ra ai nga ai.

Raitim Myen hpyen wa aq matu akyu grai rawng ai hku ka da ngut chyalu Mungdan Tarakanu langai hpe Myen ni hku nna gram mayu ai lam tsep kawp n-nga ai hpe tsun dan mayu ai. Dai gaw— 1962 ning February Shata 24 ya sha ni hta Myen ning baw ni hte Amyu Bawsang ni Yangoon Pyi lam N Sen Htawn Rung kaw Zuphpawng kaba langai galaw ma ai. Zuphpawng Tingyang up gaw Hkringmang Daju U Nu re, Amyu Bawsang ning baw ni gaw— Sam Mungdaw Hkring mang Tsat Khun Chyu, Jinghpaw Mungdaw dat kasa Du wa Zau Lawn, Sam Mungdaw dakkasa U Thun Myint, Hkang dakkasa Capt Man Tung Nung, Kaya Mungdaw dakkasa U Tsing ni hte Myen ningbaw ni Pa.Ma.Nya.Ta Ningbaw Ta Khin Chyit Maung, Pha.Sa.Pa.La Ningbaw U Ba Swe ni rai ma ai. Kaga masha ni mung zuphpawng lawm hku shanglawm na ma ai.

N dai zuphpawng a madung yaw shada lam gaw 47 Mungdan Tarakanu hpe gram na matu bawngban jahkrup hkat ai lam re. Amyubawsang ningbaw ni gaw:
(1) Mungdaw kanu (Myen ni nga ai ginra) hpe Mungdaw langai gawgap na
(2) Rapdaw 2 hpe maren mara ahkaw ahkang jaw na
(3) Amyusha Rapdaw de Mungdaw shagu rapra ai datkasa jaw na

Mungdaw ni tinang aq myit hte maren jaw dat ai ahkaw ahkang ni hpe Mung hpawm ginjaw asuya kawn shadawn masat ya nna ngam nga ai ahkaw ahkang ni hpe Mungdaw ni hta tawn da na— ngu tang shawn ai rai malu ai. Raitim Myen ningbaw ni gaw 47 Mungdan Tarakanu hpe ya na zawn ka da ai gaw n shut ai, jaw nga ai, gram ra ai lam n-nga ai — ngu dai zup hpawng hta tsun nga ai. Dai hku nan da sang shabyin da ai re lam myen ningbaw ni gwi gwi tsun nga ma ai.

N dai shara hta ngai jahkrup mayu ai gaw— 47 Mungdan Tarakanu gaw Amyu bawsang ni a matu kaji mi mung pahkam hkam ya lu ai lam n nga ai, Self-determination and Political equality tsep kawp n-nga ai majaw gram na matu jahkrup wa yang Myen ningbaw ni kaji mi mung n hkraw ai wa, ya 2008 Mungdan Tarakanu gaw 47 Mungdan Tarakanu hta, htam manu mana grau sawng ai hpe “hpang she gau ngwi gram la ga” ngu ai gaw mai byin na i Du kaba?

2008 Mungdan Tarakanu; gabaw (12) mungdan tarakanu gram na hte seng ai hta ning nga ka da ai— Rapdaw dakkasa tsa lam shadang 20% gaw mungdan tarakanu gram na matu myit hkrum tangshawn yang tara n hprang hpe Rapdaw kawn hkap la bawng ban mai ai.

Ka da ngut chyalu mungdan tarakanu kata na uphkang lam, tara je yang lam, tara gin shalat lam ni hpe gram mayu yang Rapdaw dakkasa tsa lam shadang 75% myit hkrum yang referendum galaw nna shawa yawng myit hkrum ai aq 50% jan madi shadaw yang gram mai na, nga ka da ai.

Lahta kaw ka da ai hpe yu yang 2008 Mungdan Tarakanu hpe gram la na gaw mai byin na kun?

Ngai hpaji jaw ai political approach gaw tripartite dialogue (Masum brum Mungmasa jahta) hte sa nna;
1) National reconciliation hpe galaw na
2) Constitution hpe gram na, hte Myen ginra ni hpe Mungdaw langai shabyin na
3) Transitional hkrun lam de sa na
4) Self-determination hte Political equality hpringtup rawng ai, Ngwi pyaw ramra ai Gumrawng Gumtsa Munghpawm Mungdan shabyin na
5) Sutsu Rawtjat ai Mungdan de sa nna mungdan ga daga ni hte lahpa maren kanawn mazum let simsa nywi pyaw ai mungkan hpe jawm makawp maga na

Ndai ram wa mi nye ningmu hpe tang shawn n’ngai law.

Chyeju kaba sai,

By Naw Hkam
All Kachin Students and Youth Union
Jinghpaw Wunpawng Jawngma hte Ramma Hpung


(Ndai laika hpe Slg Naw Hkam kawn ka ai re. DawngHkawnBum blog kaw e tinang aq ningmu, sawk sagawn lam, laika ngau, letter ni hpe mai mara ai. Dawng Hkawn Bum gaw Freedom of Expression hpe n'gun jaw ai re. Myu sha lam yan hta, myit hkrum lam, mai kaja lam hpe byin shangun ai, hpaji jaw ai, dinglun mahtai jawm tam ai lam ni hpe hkap tau la ga ai.)